Симон Трпчески е еден од најзначајните музички уметници во последните години, почитуван не само поради беспрекорната техника талент, туку и поради неговата топла личност и заложбата за зајакнување на културниот имиџ на Македонија.

Во 2009 година го доби Претседателскиот орден за заслуги за Македонија, како одговорен за афирмација на Македонија во странство. Во 2011 година, тој стана првиот добитник на титулата „Национален уметник на Македонија“.

Во неговата дводецениска фасцинантна кариера настапувал на најпрестижните концертни сцени во светот и со највлијателните оркестри – од Лондон до Сингапур, од Торонто до Хонг Конг. Снимил 13 албуми за престижни светски музички издавачи.

Природниот музички истражувач, Симон Трпчески, исто така се залага за зајакнување на културниот имиџ на неговата родна Македонија.

Неговиот последен проект за камерна музика „Македонисимо“ е посветен на запознавање на публиката ширум светот со богатите традиционални македонски народни корени.

Во соработка со композиторот Панде Шахов македонската народна музичка традиција е вткаена со високо виртуозни рифови и хармонии под влијание на џезот.

Од неговата успешна премиера во Германија, проектот продолжи во Словенија, Англија, Полска, Холандија, Франција, Србија, Црна Гора, Романија и други, а веќе ја најави и својата премиера во Македонија. По тој повод Симон објави:

Пред швајцарската премиера на Македонисимо во Сион, денес 04 септември 2022, како завршен концерт на фестивалот, и следниот Македонисимо концерт во престижната концертна сала Тонхале во Цирих на 11 септември 2022,

со гордост и возбуда ја најавувам официјалната Македонска премиера на Македонисимо, во Скопје на платото пред Националната опера и балет на 14 септември 2022 во 20:00 часот!

Ќе продолжиме на 25 септември во Штип и на 26 септември во Битола…. а после феноменалната и инспиративна енергија и љубов од мештаните и сите посетители што во бројка од близу 3000 дојдоа во пазувите на планината Караорман, во селото Збажди (родното место од мојот татко),

се уверија во неопишивата убавина на македонската природа, и со својата посветеност, здруженост и визија, направија претпремиерата на Македонисимо да биде светски настан во предизвикувачки достапен терен, што е пример за многу поискусни организатори во помоќни земји!

Бидете дел од музичкиот огномет со Македонисимо што Ви е посветен Вам, на Македонскиот народ! Уживајте и бидете горди со своите македонски корени!