Бидејќи земјите низ Европа сега се соочуваат со сериозен недостиг на работна сила, што предизвика големи нару шувања во последните месеци, многу влади се обидуваат да им го олеснат вработувањето на странските работници во Европската унија.

Германија воведе нова „картичка за шанси“ за привлекување на квалификувани работници од странство. „Шансенкарте“, како што ги нарекуваат во Германија, ќе користат систем за бодови за да им се олесни на квалификуваните работници со вештини да дојдат во земјата, дури и пред да најдат работа.

Кандидатите мора да бидат на возраст под 35 години, да имаат доволно јазични вештини за да живеат во земјата и да имаат најмалку три години професионално искуство на своето CV.

Тие треба да докажат дека можат да си дозволат да ги платат животните трошоци за времето кое би го поминале во Германија пред да најдат работа.

Исто така, Данска бара работници во сите гранки на индустријата. Потребни се квалификувани работници од областа на науката, правото, медицината, ИТ секторот, образованието, како и занаетчии како ковачи, електричари или металопреработувачи.

Комплетна листа на потребни професионалци е достапна во списокот за лица со високо образование и списокот за квалификувани работни места објавен од Данската агенција за меѓународно вработување и интеграција.

Списоците беа воведени на 1 јули и ќе важат до 31 декември. Доколку ви се понуди работа во една од индустриите на списокот, можете да аплицирате за данска дозвола за престој и работа.

Дозволата за престој ќе важи онолку колку што е периодот на вашето вработување – ако имате договор пократок од четири години или ќе трае четири години ако договорот е подолг.

Секој што ќе се вработи во некоја од наведените дејности ќе добие дозвола за престој со важност еден месец пред почетокот на вработувањето. Во моментов има 71.400 слободни работни места во приватниот сектор во Данска, со најголем број во главниот град Копенхаген.

Ирска нуди низа опции кои се движат од краткорочни до долгорочни визи. Потребно е веќе да се најде работа пред да се поднесе барање, а можно е да се добијат два вида работна виза: Дозвола за вработување за специфични професии и Општа дозвола за вработување.

Првата ги опфаќа професиите кои се сметаат за клучни за развојот на ирската економија, додека втората ги опфаќа сите видови работни места. По добивањето на овие дозволи, релативно е лесно да се аплицира за постојан престој во земјата.